Nëndega e Velanisë, e degës së tretë të LDK-së, “Dega e Presidentit Rugova”, Prishtinë, zona e presidentit historik Ibrahim Rugova, ka mbajtur një tubim elektoral në ShFMU “Iliria”, ku ka prezantuar programin zgjedhor dhe katër kandidatët e kësaj dege për deputet.

Anëtari i kryesisë qendrore, Alush Gashi i emocionuar rikujtoi mbylljen e kësaj shkolle në të kaluarën dhe nismën e hapjes së shtëpive shkolla dhe mbledhjen e ndihmave për 31,000 qytetarë të larguar nga zonat e luftës. Ai po ashtu tregoi përjetimin e një nga gëzimeve më të mëdha si prind kur i dërgoi dy fëmijët e tij në klasën e parë të kësaj shkolle.

“Por sonte është një kënaqësi e posaçme, sepse kësaj radhe këtu janë të pranishëm tri gjenerata të cilat lidhen rreth këtij programi të LDK-së. Këto zgjedhje e kanë një dukuri të jashtëzakonshme demokratike se vota e LDK-së si institucion demokratik emancipues i popullit tonë e ka zgjedhur kryetarin e LDK-së nga gjenerata e mesme. Kështu që në LDK aktualisht janë të zgjedhur tri gjenerata, por natyrisht gjenerata e parë, ashtu siç e thotë edhe biologjia, duhet të jetë me numër më të vogël. Gjenerata e mesme në listën tonë janë në numër më të madh, ndërsa gjenerata e re do të ketë më shumë vend për një qeverisje për të gjithë”, tha Gashi.

Sipas tij, në këtë subjekt ka pak polarizime politike duke e ilustruar këtë me pjesëmarrjen e tre ish kryetarëve, të cilët ishin ulur në rendin e dytë.